მახათას მთის მთაწმინდელი მამების სახელობის ეკლესიის ღვთისმსახური დეკანოზი იაკობ მახნიაშვილი ჰომოფობიასთან ბრძოლის საერთაშორისო დღესთან დაკავშირებით, თბილისის ცენტრში გუშინ დაგეგმილი აქციის დარბევას და აღნიშნულ ქმედებაში სასულიერო პირების მონაწილეობას ემაურება.

„ეკლესიაში დღეს პოპულარულია აზრი, რომ მთავარია რწმენა, ცოდნა კი აუცილებელი არ არის. ეს ალბათ თავის გამართლების მცდელობაა. საზოგადოებას კითხვები დაუგროვდა, ჩვენ კი ვპასუხობთ, ბევრით ნუ დაინტერესდები, თორემ დაიბნევიო. დღეს ვნახეთ ძალადობა, არანაირი სიყვარული, არანაირი თანაგრძნობა, მხოლოდ ძალადობა. უახლოეს წარსულში ბევრი მიტინგი და გამოსვლა გვახსოვს. მაგრამ ის ზიზღი, რაც დღეს ვნახე, ადამიანების თვალებში არასდროს მინახავს. დღეს ჩემთვის ცხადი გახდა, თუ რა მასშტაბებს იძენს აგრესია, თუკი იგი რელიგიურობით არის მოტივირებული. ამიტომაც იყო, რომ ყველაზე სასტიკი ომები, რაც კი კაცობრიობას უნახავს, სწორედ რელიგიური ომებია. ძალადობის დროს ყველა ადამიანს შიში აქვს - ვაითუ, ღმერთმა მიწყინოს, ვაითუ, დავისაჯო, მაგრამ როცა იცი, რომ მწვანე გაქვს ანთებული ეკლესიისაგან, იერარქებისაგან და ფიქრობ, რომ თვით ღმერთისაგანაც კი, მაშინ, განსაკუთრებით სასტიკი ხდები. თვალნათლივ დავინახე და ეს მარტო ჩემი აზრი არ არის. მათ, ვინც ქუჩაში იდგნენ და აქციას შორიდან აკვირდებოდნენ, ყველამ დაინახა, რა მდგომარეობაში იყვნენ ეს ადამიანები. აქციაზე მოვიდნენ ადამიანები ხატებით, სტიქარებით… განსაკუთრებით აგრესიულები სკოლის მოსწავლეები და სტუდენტები იყვნენ. ზრდასრული ადამიანები იმდენად არ აქტიურობდნენ. ქრისტიანული კულტურა გულისხმობს ზრდილობას, თავმდაბლობას, სიმშვიდეს. ხშირად ამბობენ, რომ ჩვენი წინაპრები ამას ვერ აიტანდნენო, მაგრამ ჩვენი წინაპრები ასე საცემად უიარაღო ადამიანზე არ გაიწევდნენ. დღეს გოგონებს უტყეს. ღვთის წყალობაა, რომ ეს ადამიანები გაერიდნენ, თორემ აუცილებლად დაიღვრებოდა სისხლი. ამ მასის შეჩერება შეუძლებელი იყო,"–აღნიშნა დეკანოზმა იაკობ მახნიაშვილმა „ლიბერალთან" ინტერვიუში.